Mon, 21/10/2013 - 15:01

GME ataatsimiisitsinerit 12 ingerlappai

Apeqqutit isumannaallisaaneq, peqqinneq aammalu suliffiit pillugit Kujataani ataatsimiisitsinerni qaqinneqartut

Kujataani innuttaasut qaammatit kingulliit arlallit Greenland Minerals & Energy oqaloqatiginissaanut ataatsimiigiaqqusinernut qaaqqusaasimapput. Augustip naajartornerani GME kujataata nunaqarfiini 8-ni innuttaasuinik ataatsimiisitsivoq, aasarlu aallartilaaginnartoq Narsami, Qaqortumi aammalu Nanortalimmi ataatsimiisitsilluni.

Avatangiisip peqqinnerlu sunnigaasinnaanera qitiusumik apeqqutitut peqataasunit qaqinneqarput. GME pisortaa, Shaun Bunn, misissueqqaarnerni pisortaq Jeremy Whybrow aammalu ulluinnarni ingerlatsisoq Ib Laursen piiaavimmik pilersaarusiamik saqqummiussipput. Ukiuni arlaqartuni misissueqqaarnerni, qillerinerit 75 km-it missaanik isorartutigisutut annertutigisumik ingerlanneqartunik, GME-p takutissinnaanngorpaa ilumut Kuannersuit saviminissat qaqutigoortunik aammalu uranimik akulimmik nunarsuarmi annerpaat ilaattut inissisimasuulluni piiaaffiusinnaasoq.

Narsarsuarmi ataatsimiigiartut arlaqarput

Narsarsuarmi ataatsimiigiartut arlaqarput

Pujoralak aammalu qinngorneq

Kuannersuarni piiaaffimmiit Narsamut narlumuinnaq kilometerit 10 missaaniissapput, ataatsimiisitsinernilu apeqqut uteqattaartuartoq tassaavoq pujoralammik mingutsitsineq. GME-p sinniisui nassuiaassipput qanoq periaatsit nutaaliat atorlugit qaartitserinermi pujoralatsitsineq Narsamut sunniutaasinnaasut millisarneqarsinnaasut. Qaartitikkanik aserorterineq matoqasumi ingerlanneqassapput.

Illersuutit ilaattut pilersinneqartussaq tassaavoq Narsami aammalu eqqaani ataavartumik pujoralammik aammalu qinngornermik ulorianartumik uuttuineq, anorlilivissornerani qaartiterineq unitsinneqarsinnaaniassammat.

Kuannersuarnerni pissutsit allannguuteqanngitsut

Apeqqut radon-mik qaarsumit aniatitsisinnaaneq pillugu ataatsimiinnerni aamma qaqinneqarpoq. GME-mit akineqarpoq radon-mik aniatitsineq piiaaffimmit sunnigaanavianngitsoq. Sinnikut – aserorterinerup aammalu immikkoortiterinerup kingorna – katersorneqassapput imermillu qallerneqarlutik, taamaasilluni radon-mik aniatitsineq unitsinneqassalluni.

Sulisussat aammalu Narsarmiut peqqissusaat pillugit ataatsimiinnerni apeqqutit arlallit eqqartorneqarput. GME-mit Shaun Bunn aamma Ib Laursen nassuiaassipput qinngorneq ulorianartup annertussusaa piiaaffimmi allanngornavianngitsoq. Ullumikkut Kuannersuarni qinngorneranik sunniutaasinnaanera piiaanermi annertusinavianngilaq. GME erseqqissarpaa Kuannersuarni sulisussat qinngornermik sunnigaasinnaanerat annikinnerussasoq, assersuutigalugu timmisartortartunit aammalu stewardessinit.

Tasiusami oqaaseqartut arlaqarput

Tasiusami oqaaseqartut arlaqarput

Kalaallisut oqaasilinnut suliffissat

Kuannersuarni sulilersinnaaneq ataatsimiinnerni tamangajanni eqqartorneqarpoq. Oqaatsit marluk piginnaaffigisariaqarpat? Tuluttut oqalussinnaasariaqarpa? Nunaqarfimmi najugaqaraanni aatsitassarsiorfimmi sulilertoqarsinnaava?, apeqqutigineqarajuttut ilagaat.

GME qularnaveequserpaa kalaallisuinnaq oqaasillit aamma Kuannersuarni sulilersinnaasut. Sulisut arlallit kalaallit ilinniartinneqarsimapput sulisut sinniisussaattut aammalu aatsitassarsiornermi tulluarsakkamik tuluttut ilinniartinneqarlutik – ilinniartitsinerit annertusarniarneqarput Namminersorlutik Oqartussat piiaanissamut akuersissappata. Oqaatsinik Ilinniarfik Sisimiuniittoq Kommuneqarfik Kujalleq suleqatigalugu aatsitassarsiornermut tullarsakkamik tuluttut ilinniarneq neqeroorutigivaat, tamannalu periarfissatsialaavoq Kuannersuarni sulilersinnaanissamut piareersarusukkaanni.

Nunatta sinneranit sulisut

Suliffiit tamarmik Narsarmiuinnarnik atorfigineqarnavianngillat. GME naatsorsuutigaa sulisussat ilai Kalaallit Nunaata kujataaniissasut – imaluunniit sinerissap sinneranit. Sulisut immikkut ilisimasallit tikisitatulli inissisimassapput Kuannersuarnilu sapaatit akunneri arlalinnik sulisassallutik, taamatulli sulinngiffeqartassallutik.

GME aasaq aallartilaaginnartoq Narsami, Qaqortumi, Nanortalimmi aamma Nuummi ataatsimiisitsivoq. Augustusip naanerani Aappilattuni, Narsarmijini, Tasiusami, Ammassivimmi, Alluitsup Paani, Saarlumi, Eqalugaarsunni aammalu Narsarsuarmi ataatsimisitsisoqarluni.