Thu, 20/03/2014 - 17:21

Kalaallit Naalakkersuisui Australiami uranisiorfik tikeraarpaat

Naalakkersuisut ilaasortaatitaat marluk Kalaallit Nunaanneersut februarip ingerlanerani Australiamiipput aatsitassarsiornerup aammalu avatangiisinik illersuinermut isumassarsiorlutik. Taamatuttaaq Inatsisartut aatsitassanut ataatsimiititaliap ilaasortai aamma peqataallutik.

Politikerit nunatsinneersut uranisiorfik Olympic Dam tikeraarpaat, tassanilu uran saniatigut kanngussassaq, kuulti aammalu siilvi piiarneqarlutik, aammalu misigalugu qanoq inuuniarneq ingerlanneqarnersoq Roxy Downs-imi.

Nuummi Naalakkersuisut maannamut piareersaapput qanoq siunissami uranimik akulinnik aatsitassanik piiaasoqarsinnaassasoq. Australiamiut pisortaanik ataatsimeeqateqartarnikkut, angalaartut qanoq Australiami uranisiorneq inatsisiliunneqarnersoq aammalu qanoq nakkutigineqarnersoq paasisaqarfigaat, Naalakkersuisuniillu tikeraarneq pitsaasumik nalilerneqarluni.

-Australiami pissutsit tamakkiisumik qiviaraanni takuneqarsinnaavoq qanoq annertutigisumik nakkutigineqartoq, tassanimi nunat tamalaat najoqqutassiaat naapertorlugit qitiusumik aamma siammasinnerusumik ingerlatsisoqarmat. Qitiusumik aammalu siammasinnerusumik pisortaqarfiusut pingaartippaat, ulluinnarni nakkutilliineq aatsitassarsiornikkut, assartuinikkut aammalu tunisassiornikkut, nunat tamalaat najoqqutaat naapertorlugit ingerlanneqassasut. Australiami pisortaqarfiit tikilluaqqusilluarput, tamarmiullutillu Kalaallit Nunaata suliaminik ineriartortitsinermini ikiuullutillu siunnersuiniarlutik, Naalakkersuisut taamak nalunaaruteqarput.