Thu, 16/01/2014 - 12:39

Kalaallit Nunaat aatsitassarsiorfitsialattut nersorneqarpoq

Kalaallit Nunaat nunarsuaq tamakkerlugu 2013-2014-mi aatsitassarsiorfigisassallugu pitsaanersaavoq. Taamak oqaasertalimmik decemeberimi Europap aatsitassanut aningaasaliisartunullu sammisaqartunut ataatsimeersuartitsinerit annersaanni pisumi ”Mines & Money London”-mi nersornaat ”Country Award 2013” Kalaallit Nunaannut tunniunneqarpoq  

Aviisi Mining Journal nersornaat ”Outstanding Achievement Awards” ataatsimeersuarnermi tunniussisuuvoq, tassanilu Kalaallit Nunaat ”nunani tamani aatsitassarsiorfiusuni pitsaanersaattut 2013-2014-mi toqqagaalluni”.

Kalaallit Nunaat saniatigut Mongolia, Azerbaijan aammalu Australien nersornaammut innersuussaasimallutik. Kalaallit Nunaat toqqagaanera tunngaveqarpoq Naalakkersuisut uranimut naaggaarluinnarneq atorunnaarsimmassuk, aammalu Isuani saviminissarsiorfimmik aammaasoqarsinnaaneranik akuersissummik tunniussisoqarnerat.

”Nersorneqarnerput nuannaraarput. Tamanna takussutaavoq nunarsuarmioqatitta suliatsinnik aammalu politikkikkut anguniakkagut iluarineqartut, siunissami aatsitassarsiorfiunissarput eqqarsaatigalugu”, taamak oqarpoq Inuussutissarsiornermut Aatsitassaqarnermut Suliffeqarnermullu Naalakkersuisoq Jens-Erik Kirkegaard.