Inuusuttut tamakkerlutik ilinniarnertuungorniarnissartik eqqarsaatiginngilaat; kukimimi ataat iperterusunneruaat assatillu atorlugit ilinniarlutik - atorfissaqartinneqarpullumi. Ajornartorsiutaavoq suliffeqarfeerarpassuit ilinniartumik atorfeqartitsinissaminnut akissaqarneq ajoramik. Greenland Minerals and Energy isumassarsiatsialaqarpoq, taamaattumik sullisileritsi!

Kuannersuarni aatsitassarsiorfik suliffissanik siornatigut takuneqarsimanngitsunik kujataani periarfissiiginnanngilaq, aatsitassarsiorfik aamma inuussutissarsiutinut allanut annertuumik sunniuteqassaaq. Aatsitassarsiorfimmi suliffik ataaseq avataatitigut suliffimmik aatsitassarsiorfimmut attuumassutilimmik allamik pilersitsisarpoq - ILO-mit Genève-mi allaffeqarfeqartumit tamanna naatsorsorneqarsimavoq (International Arbejdsorganisation).

Kuannersuarni aatsitassarsiorfik aamma kujataani inuusuttunut nutaanik periarfissanik pilersitsissaaq. Siullertut ilinniarfissatsialannik pilersitsisoqassaaq aatsitassarsiornermut attuumassuteqartuni suliffinni suliffeqarfiullu allaffeqarfiani. Aappaattut ilinniarfissat nutaat- suliffissanillu periarfissat suliffeqarfeerarpassuarni aatsitassarsiortunut kiffartuussisuni. 

Greenland Minerals and Energy A/S-imit allanut suleqateqarluarnerit atuutereersut atorluarneqassapput kujataani suliffeqarfeeqqat attaveqarfiginerisigut, ataasiakkaarlugillu siunissami pisariaqartitsinivut pillugit oqaloqatigalugit, qanorlu suliffeqarfiit ataasiakkaarlutik kiffartuussisinnaanerat pillugu. Oqaloqatigiinnerit pineqartut aallaavigalugit suliffeqarfiit isumaqatigiissuteqarfigineqarlutik suleqatigineqalissapput, siunissami ikorfartuutaasinnaasutut naatsorsuutivut - maanna suliffeqarfiit arlallit suleqatigilereernikuuavut. isumaqarpugut pingaaruteqartoq, siunissami niueqatissat suleqatigiit akornanni ersarissumik ilisimasat paaseqatigiinnerlu aallaavigalugit ingerlanneqassasut. Uatsinnut aatsitassarsiortutut pingaaruteqarpoq suleqatitsinnut piumasaqaatit ersarissooqqissaarnissaat.

Suleqatigiinneq tigussaasoq uagut suliffeqarfeeqqallu akornanni ittoq aqqutissaasinnaavoq inuusuttut pillugit ajornartorsiutip ikiorsiivigineqarnissaannut. siunnersuutigaarput ilinniartuuteqariaaseq nutaaq, piffissaq ungasinngitsoq qaangiuppat kujataani saqqummiutilersaagarput, siunnersuut pillugu Kalaallit Nunaanni Sulisitsisut Kattuffiat Sulisartut Kattuffiallu SIK oqaloqatigalugit aallartereerpavut. Siunertaq unaavoq, kujataani suliffeqarfeeqqat aningaasatigut ikorfartussagivut, taamaalillutik ilinniartunik atorfinitsitsisinnaanngortillugit.